ಬೊಮ್ಮಗಟ್ಟಿರಾಯ ಪಾಲಿಸೊ ನಮ್ಮ ನೀ ಮಾರಾಯ

ರಾಗ : ಪಂತುವರಾಳಿ

ತಾಳ : ಆದಿತಾಳ

ಬೊಮ್ಮಗಟ್ಟಿರಾಯ ಪಾಲಿಸೊ ನಮ್ಮ ನೀ ಮಾರಾಯ

ಧರ್ಮ ಕಾಮ್ಯಾರ್ಥ ಕೊಡುವೋ ಕರುಣಾಂಬುಧಿ | ಪ |

ಸುಗ್ರೀವಗೆ ನೀ ಒಲಿದ್ವಾಲಿಯನು

ನಿಗ್ರಹ ಮಾಡುತ ಪರಮಾಗ್ರಹದಲಿ

ಶೀಘ್ರದಿಂದಲಿ ದಶಗ್ರೀವನ ಲಂಕ

ದುರ್ಗದಲ್ಲಾಡಿದ್ಯಗ್ನಿಯ ಒಡಗೂಡಿ | ೧ |

ರಾಮಪಾದಾಂಬುಜ ಸೇವಕ ಸೇತುವೆ

ಪ್ರೇಮದಿ ಕಟ್ಟಿ ನಿಂತನು ರಣದಿ

ನೇಮದಿಂದಲಿ ಸಂಜೀವನ ತಂದಾತ

ವಾಹನನಾದ ತ್ರಿಧಾಮದೊಡೆಯಗೆ | ೨ |

ವಾತಾತ್ಮಜ ರಘುನಾಥಗೆ ನೀ ನಿಜ

ದೂತನೆನಿಸಿ ಬಹು ಪ್ರೀತಿಯಲಿ

ಭೂತಳದೊಳು ಪ್ರಖ್ಯಾತಿಯ ಪಡೆದೆ

ನಿರ್ಭೀತನಾದ ಭೀಮೇಶಕೃಷ್ಣನ ಪ್ರಿಯ | ೩ |