ಅಪಮೃತ್ಯು ಪರಿಹರಿಸೋ ಅನಿಲದೇವ

ರಾಗ : ಕಾಂಭೋದಿ

ತಾಳ : ಝಂಪೆತಾಳ

ಜಗನ್ನಾಥದಾಸರ ಕೃತಿ

ಅಪಮೃತ್ಯು ಪರಿಹರಿಸೋ ಅನಿಲದೇವ

ಕೃಪಣವತ್ಸಲನೆ ಕಾವರ ಕಾಣೆ ಜಗದೊಳಗೆ | ಪ |

ನಿನಗಿನ್ನು ಸಮರಾದ ಅನಿಮಿತ್ತ ಬಾಂಧವರು

ಎನಗಿಲ್ಲ ಆವಾವ ಜನುಮದಲ್ಲಿ

ಅನುದಿನವು ಎಮ್ಮನು ಉದಾಸೀನ ಮಾಡುವುದು

ಅನುಚಿತವು ಜಗದಿ ಸಜ್ಜನ ಶಿಖಾಮಣಿಯೆ | ೧ |

ಕರುಣಾಭಿಮಾನಿಗಳು ಕಿಂಕರರು ಮೂರ್ಲೋಕದರಸು

ಹರಿಯು ನಿನ್ನೊಳಗಿಪ್ಪ ಸರ್ವಕಾಲ

ಪರಿಸರನೆ ಈ ಭಾಗ್ಯ ದೊರೆತನಕೆ ಸರಿಯುಂಟೆ

ಗುರುವರ್ಯ ನೀ ದಯಾಕರನೆಂದು ಪ್ರಾರ್ಥಿಸುವೆ | ೨ |

ಭವರೋಗ ಮೋಚಕನೆ ಪವಮಾನರಾಯ

ನಿನ್ನವರನು ನಾನು ಮಾಧವಪ್ರಿಯನೆ

ಜವನ ಬಾಧೆಯ ಬಿಡಿಸೋ ಅವನಿಯೊಳು ಸುಜನರಿಗೆ

ದಿವಿಜಗಣ ಮಧ್ಯದಲಿ ಪ್ರವರ ನೀನಹುದೋ | ೩ |

ಜ್ಞಾನಾಯುರೂಪಕನು ನೀನಹುದೋ ವಾಣಿ

ಪಂಚಾನನಾದ್ಯಮರಿಗೆ ಪ್ರಾಣದೇವ

ದೀನವತ್ಸಲನೆಂದು ನಾ ನಿನ್ನ ಮೊರೆಹೊಕ್ಕೆ

ದಾನವಾರಣ್ಯ ಕೃಶಾನು ಸರ್ವದಾ ಎನ್ನ | ೪ |

ಸಾಧನ ಶರೀರವಿದು ನೀ ದಯದಿ ಕೊಟ್ಟದ್ದು

ಸಾಧಾರಣವಲ್ಲ ಸಾಧು ಪ್ರಿಯನೇ

ವೇದವಾದೋದಿತ ಜಗನ್ನಾಥವಿಠಲನ

ಪಾದಭಜನೆಯಿತ್ತು ಮೋದ ಕೊಡು ಸತತ | ೫ ।