ಎಣೆಯಾರೋ ನಿನಗೆ ಹನುಮಂತರಾಯ

ರಾಗ : ನಾಟಿ

ತಾಳ : ಆದಿತಾಳ

ವಾದಿರಾಜರ ಕೃತಿ

ಎಣೆಯಾರೋ ನಿನಗೆ ಹನುಮಂತರಾಯ | ಪ |

ಎಣೆಯಾರೋ ನಿನಗೆ ತ್ರಿಭುವನದೊಳಗೆಲ್ಲ

ಪ್ರಣತಜನ ಮಂದಾರ ಪವನ ಸುಕುಮಾರ | ಅ ಪ |

ಅಡಿಗಡಿಗೆ ರಾಮಪದಾಂಬುಜಕೆ ವಂದಿಸುತ

ನಡೆನಡೆದು ಮುದ್ರಿಕೆಯ ಪಡೆದು ಮುದದಿ

ದಡದಡನೆ ಅಂಬುಧಿಯ ದಾಟಿ ಸೀತೆಗೆ ಗುರುತ

ಕೊಡುಕೊಡುತ ಕುಸ್ತರಿಸಿದಂಥ ಹನುಮಂತ | ೧ |

ಗರಗರನೆ ಪಲ್ಗಡಿದು ಕಲುಷದೈತ್ಯರನೆಲ್ಲ

ಚರಚರನೆ ಸೀಳಿ ಸಂಭ್ರಮದಿಂದ

ಬಿರಬಿರನೆ ಕಣ್ಬಿಡುತ ಬಿಂಕದಲಿ ಲಂಕೆಯನು

ಸುರಸುರನೆ ಬಾಲದಲಿ ಸುಟ್ಟ ರಣದಿಟ್ಟ | ೨ |

ಫಳಫಳನೆ ಆರ್ಭಟದಿಂದ ರಾವಣನ

ನಳನಳನೆ ಬೆಳೆದ ನಂದನವ ಕಿತ್ತು

ಖಳಖಳನೆ ನಗುತ ದಶಕಂಧರನ ಗುದ್ದಿ ಬಂದೆ

ಭಳಿಭಳಿರೆ ಹಯವದನದಾಸ ನಿಸ್ಸೀಮ | ೩ |