ವೀರ ಹನುಮ ಬಹು ಪರಾಕ್ರಮ

ರಾಗ : ಆನಂದ ಭೈರವಿ

ತಾಳ : ಆಟತಾಳ

ಪುರಂದರ ದಾಸರ ಕೃತಿ

ವೀರ ಹನುಮ ಬಹು ಪರಾಕ್ರಮ | ಪ |

ಸುಜ್ಞಾನವಿತ್ತು ಪಾಲಿಸೆನ್ನ ಜೀವರೋತ್ತಮ | ಅ ಪ |

ರಾಮದೂತನೆನಿಸಿಕೊಂಡೆ ನೀ, ರಾಕ್ಷಸರ ಮನವೆಲ್ಲ ಕಿತ್ತು ಬಂದೆ ನೀ

ಜಾನಕಿಗೆ ಮುದ್ರೆಯಿತ್ತು, ಜಗತಿಗೆಲ್ಲ ಹರುಷವಿತ್ತು

ಚೂಡಾಮಣಿಯ ರಾಮಗಿತ್ತು, ಲೋಕಕೆ ಮುದ್ದೆನಿಸಿ ಮೆರೆವ | ೧ |

ಗೋಪಿಸುತನ ಪಾದ ಪೂಜಿಸಿ, ಗದೆಯ ಧರಿಸಿ ಬಕಾಸುರನ ಸಂಹರಿಸಿದೆ

ದ್ರೌಪದಿಯ ಮೊರೆಯ ಕೇಳಿ, ಮತ್ತೆ ಕೀಚಕನ್ನ ಕೊಂದು

ಭೀಮನೆಂಬ ನಾಮ ಧರಿಸಿ, ಸಂಗ್ರಾಮಧೀರನಾಗಿ ಜಗದಿ | ೨ |

ಮಧ್ಯಗೇಹನಲ್ಲಿ ಜನಿಸಿ ನೀ, ಬಾಲ್ಯದಲಿ ಮಸ್ಕರೀಯ ರೂಪಗೊಂಡೆ ನೀ

ಸತ್ಯವತಿಯ ಸುತನ ಭಜಿಸಿ, ಸನ್ಮುಖದಿ ಭಾಷ್ಯ ಮಾಡಿ

ಸಜ್ಜನರ ಪೊರೆವ, ಮುದ್ದು ಪುರಂದರವಿಠಲ ದಾಸ | ೩ |