ಪ್ರಾಣ ಬಾರೋ ಜಗತ್ರಾಣ ಬಾರೋ

ರಾಗ : ಮೋಹನ

ತಾಳ : ಆದಿತಾಳ

ಗುರು ಗೋವಿಂದದಾಸರ ಕೃತಿ

ಪ್ರಾಣ ಬಾರೋ ಜಗತ್ರಾಣ ಬಾರೋ

ಪ್ರಾಣಿ ಸಕಲ ಕರ್ಮ ಮಾಳ್ಪ ಜಾಣ ಬಾರೋ | ಪ |

ಪಂಚ ರೂಪದಿ ಪ್ರಾಪಂಚ ವ್ಯಾಪ್ತ ಬಾರೋ

ಹಂಚಿಕೇಲಿ ದೈತ್ಯೆಯರ ವಂಚಕನೆ ಬಾರೋ | ೧ |

ಪಾಯುಪಸ್ತಕರ್ಮ ಗೈವಾಪಾನ ಬಾರೋ

ವಾಯುವ ನೀ ನಿರೋಧಿಸೆ ಕಾಯ್ವರಾರೋ | ೨ |

ಗೋಣುಮುರಿವ ಭಾರಹೊರೆವ ವ್ಯಾನ ಬಾರೋ

ಪ್ರಾಣಪಂಚ ವ್ಯೂಹ ಮುಖ್ಯವ್ಯಾನ ಬಾರೋ | ೩ |

ಉದಕ ಅನ್ನಕ್ಕವಕಾಶುದಾನ ಬಾರೋ

ಮುದದಿ ಶ್ವಾಸಮಂತ್ರ ಜಪ ಜಾಣ ಬಾರೋ | ೪ |

ವೈದಿಕ ಲೌಕಿಕ ಶಬ್ದ ನುಡಿಸೇ ಬಾರೋ

ಊರ್ಧ್ವಗತಿ ದಾತನೆ ಉದಾನ ಬಾರೋ | ೫ |

ಪಾನ ಅನ್ನಗಳ್ಹಂಚೆ ಸಮಾನ ಬಾರೋ

ಧ್ಯಾನವಿಂತು ಈವ ಮುಖ್ಯಪ್ರಾಣ ಬಾರೋ | ೬ |

ಕರುಣಾಸಾಗರ ದೇಹ ವೀಣೆ ಚರಿಸೆ ಬಾರೋ

ಗುರುಗೋವಿಂದವಿಠಲಾಧೀಷ್ಠಿತ ಗುರುವೇ ಬಾರೋ | ೭ |