ಜಾಣ ನೀನಹುದೋ ಗುರು ಮುಖ್ಯಪ್ರಾಣ ನೀನಹುದೋ

ರಾಗ : ಕಲ್ಯಾಣಿ

ತಾಳ : ಆಟತಾಳ

ವ್ಯಾಸರಾಜರ ಕೃತಿ

ಜಾಣ ನೀನಹುದೋ ಗುರು ಮುಖ್ಯಪ್ರಾಣ ನೀನಹುದೋ | ಪ |

ರಾಣಿ ಭಾರತೀರಮಣ ನಿನಗೆಣೆಕಾಣೆ ತ್ರಿಭುವನದೊಳಗೆ ಸರ್ವ

ಪ್ರಾಣಿಗಳ ಹೃದಯದಲಿ ಮುಖ್ಯ ಪ್ರಾಣನೆಂದೆನಿಸಿದೆಯೋ ಸ್ವಾಮಿ | ಅ ಪ |

ಧೀರ ನೀನಹುದೋ ವಾಯುಕುಮಾರ ನೀನಹುದೋ

ಸಾರಿದವರ ಮನೋರಥಂಗಳ

ಬಾರಿಬಾರಿಗೆ ಕೊಡುವೆನೆನುತಲಿ

ಕ್ಷೀರನದೀತೀರದಲಿ ನೆಲೆಸಿಹ

ಮಾರುತಾವತಾರ ಹನುಮ | ೧ |

ಧಿಟ್ಟ ನೀನಹುದೋ ಬೆಟ್ಟ ತಂದಿಟ್ಟವ ನೀನಹುದೋ

ರಟ್ಟೆ ಹಿಡಿದಕ್ಷಯಕುಮಾರನ

ಕುಟ್ಟಿ ದೈತ್ಯರ ಕೆಡಹಿ ಬೇಗದಿ

ಸುಟ್ಟು ಲಂಕೆಯ ಸೀತೆಗುಂಗುರ

ಕೊಟ್ಟೆ ಮೂಜಗಜೆಟ್ಟಿ ಹನುಮ | ೨ |

ಚಂಡ ನೀನಹುದೋ ದುರಿತ ಮಾರ್ತಾಂಡ ನೀನಹುದೋ

ಕುಂಡಲವು ಕಿರಿಘಂಟೆ ಉಡಿಯಲಿ

ಪೆಂಡೆ ನೂಪುರ ಕಾಲಲಂದಿಗೆ

ತಂಡತಂಡದಿ ಕೃಷ್ಣನಂಘ್ರಿ

ಪುಂಡರೀಕಕೆ ಕೈಯ ಮುಗಿದ | ೩ |