ಮಂಗಳಾರತಿ ತಂದು ಬೆಳಗಿರೆ

ಮಂಗಳಾರತಿ ತಂದು ಬೆಳಗಿರೆ

ಅಂಬುಜಾಸನ ರಾಣಿಗೆ

ಅಂಬೆಗೆ ಜಗದಂಬೆಗೆ ಮೂಕಾಂಬೆಗೆ

ಶಶಿ ಬಿಂಬೆಗೆ//

ಶುದ್ಧ ಸ್ನಾನವ ಮಾಡಿ ನದಿಯಲಿ

ವಜ್ರಪೀಠದಿ ನೆಲೆಸಿರೆ

ತಿದ್ದಿ ತಿಲಕವ ತೀಡಿದಂತ

ಮುದ್ದು ಮಂಗಳ ಗೌರಿಗೆ//

ಎರೆಡು ಪೀತಾಂಬರವನ್ನುಡಿಸಿ

ಸರ್ವಾಭರಣ ರಚಿಸಿದ

ಹರಳಿನೋಲೆ ವಜ್ರಮೂಗುತಿ

ವರಮಹಾಲಕ್ಷ್ಮಿ ದೇವಿಗೆ//

ನಿಗಮ ವೇದ್ಯಳೆ ನಿನ್ನ ಗುಣಗಳ

ಬಗೆಬಗೆಯಲಿ ವರ್ಣಿಪೆ

ತೆಗೆದು ಭಾಗ್ಯವ ನೀಡು ಎನುತ

ಜಗದೊಡೆಯನ ಮಡದಿಗೆ//

ಹುಟ್ಟುಬಡವೆಯ ಕಷ್ಟ ಕಳೆದು

ಕೊಟ್ಟಳರಸನ ಸಿರಿಯನು

ಹೆತ್ತ ಕುಮಾರನ ತೋರಿದಂತ

ಶುಕ್ರವಾರದ ಲಕ್ಷ್ಮಿಗೆ//