ಹನುಮಂತ ನೀ ಬಲು ಜಯವಂತನಯ್ಯಾ

ರಾಗ : ಸಾವೇರಿ

ತಾಳ : ಛಾಪತಾಳ

ವಾದಿರಾಜರ ಕೃತಿ

ಹನುಮಂತ ನೀ ಬಲು ಜಯವಂತನಯ್ಯಾ || ಪ ||

ಅನುಮಾನವಿಲ್ಲದಾನಂದತೀರ್ಥಾಚಾರ್ಯ || ಅ ಪ ||

ರಾಮಸೇವಕನಾಗಿ ರಾವಣನ ಪುರವ ನೀ

ಧೂರ್ಮ ಮಾಡಿದ್ಯೋನಿಂದು ನಿಮಿಷದೊಳಗೆ

ಭೂಮಿ ಪುತ್ರಿಗೆ ಮುದ್ರೆ ಉಂಗುರವನಿತ್ತು ನೀ

ಪ್ರೇಮ ಕುಶಲವ ರಾಮಪಾದಕರ್ಪಿಸಿದೆ || ೧ ||

ಕೃಷ್ಣಾವತಾರದಲಿ ಭೀಮನಾಗ್ಯವತರಿಸಿ

ದುಷ್ಟ ದೈತ್ಯರನೆಲ್ಲ ಸಂಹರಿಸಿದೆ

ದೃಷ್ಟಿಹೀನನಾದ ಧೃತರಾಷ್ಟ್ರನ್ವಂಶವ ನೀ

ಕಷ್ಟವಿಲ್ಲದೆ ಕೊಂದು ಶ್ರೀಕೃಷ್ಣಗರ್ಪಿಸಿದೆ || ೨ ||

ಪತಿತಸಂಕರ ಪುಟ್ಟಿ ಮತವೆಲ್ಲ ಕೆಡಿಸಲು

ಮತಿಹೀನರಾಗೆ ಸಜ್ಜನಗಳೆಲ್ಲ

ಅತಿವೆಗದಲಿ ಮಧ್ವಯತಿಯಾಗಿ ಅವತರಿಸಿ

ಗತಿಯ ತೋರಿಸಿದೆ ಹಯವದನ ನಿಜದಾಸಾ || ೩ ||