ಮಾಮಝ ಬಾಪುರೆ ಭಳಿರೆ ಹನುಮಂತ

ರಾಗ : ಮೋಹನ

ತಾಳ : ಆಟತಾಳ

ಮಾಮಝ ಬಾಪುರೆ ಭಳಿರೆ ಹನುಮಂತ || ಪ ||

ರಾಮಪದ ಸೇವಿಪ ವೀರ ಹನುಮಂತ || ಅ ಪ ||

ಹುಟ್ಟುತಲೇ ಹೊನ್ನ ಕಚ್ಚುಟವ ಕುಂಡಲವೆರಿಸಿ

ನಿಷ್ಟೆಯಲಿ ರಘುಪತಿಯ ಪಾದವನೇ ಕಂಡು

ದಿಟ್ಟ ಹರಿದಾಡಿ ಮನಮುಟ್ಟಿ ಪೂಜಿಸಲಜನ

ಪಟ್ಟಕನುವಾದ ಸಿರಿವಂತ ಹನುಮಂತ || ೧ ||

ಅಂಬರಕೆ ಪುಟನೆಗೆದು ಅಂಬುಧಿಯ ನೆರೆದಾಟಿ

ಕುಂಭಿಣಿಯ ಮಗಳಿಗುಂಗುರವನಿತ್ತೆ

ಬೆಂಬಿಡದೆ ಲಂಕೆಯನು ಸಂಭ್ರಮದಿ ಸಖಗಿತ್ತೆ

ಗಂಭೀರ ವೀರಾಧಿವೀರ ಹನುಮಂತ || ೨ ||

ಅತಿದುರುಳ ರಕ್ಕಸನು ರಥದ ಮೇಲಿರಲು

ರಘುಪತಿಯು ಪದಚರಿಯಾಗಿ ನಿಂತಿರಲು

ಪೃಥಿವಿ ಗಗನಕೆ ಬೆಳೆದು ರಥವಾದೆ ಒಡೆಯನಿಗೆ

ಅತಿ ಭಯಂಕರ ಸತ್ವವಂತ ಹನುಮಂತ || ೩ ||

ಒಡೆಯ ಉಣಕರೆಯಲಂದಡಿಗಡಿಗೆ ಕೈ ಮುಗಿದು

ದೃಢ ಭಕುತಿಯಿಂದ ಮೌನದಲಿ ಕುಳಿತು

ಎಡೆಯಕೊಡೆದ್ದೋಡಿ ಗಗನದಲಿ ಸುರರಿಗೆ

ಕೊಡುತ ಸವಿದುಂಡ ಗುಣವಂತ ಹನುಮಂತ || ೪ ||

ಪ್ರಥಮದಲಿ ಹನುಮಂತ ದ್ವಿತೀಯದಲಿ ಕಲಿಭೀಮ

ತೃತೀಯದಲಿ ಗುರುಮಧ್ವಮುನಿಯು ಎನಿಸಿ

ಪ್ರತಿ ಇಲ್ಲದಲೆ ಮೆರೆದೆ ಪುರಂದರ ವಿಠಲ

ಭಕ್ತ ನಿನಗಾರು ಸರಿ ವಿಜಯ ಹನುಮಂತ || ೫ ||