ಏಳೇಳು ಶರಧಿಯು ಏಕವಾಗಿದೆ ಕಂಡ್ಯ

ರಾಗ : ಸೌರಾಷ್ಟ್ರ

ತಾಳ : ಆಟತಾಳ

ಪುರಂದರದಾಸರ ಕೃತಿ

ಏಳೇಳು ಶರಧಿಯು ಏಕವಾಗಿದೆ ಕಂಡ್ಯ

ಹ್ಯಾಗೆ ಬಂದೆಯೋ ಹೇಳೋ ಕೋತಿ || ಪ ||

ಏಳು ಶರಧಿಯು ಎನಗೆ ಏಳು ಕಾಲುವೆಯು

ತೂಳಿಲಂಘಿಸಿ ಬಂದೆ ಭೂತ || ಅ ಪ ||

ಏಳು ಸಮುದ್ರದೊಳಿರುವ ಮಕರಿ ಮತ್ಸ್ಯ

ಹ್ಯಾಗೆ ಬಿಟ್ಟರು ಹೇಳು ಕೋತಿ

ಏಳು ಸಮುದ್ರದ ಮಕರಿ ಮತ್ಸ್ಯದ ಕೂಡೆ

ಮಾತಾಡಿ ಬಂದನೋ ಭೂತ || ೧ ||

ಲಂಕಾದ್ವಾರದೊಳೊಬ್ಬ ಲಂಕಿಣಿ ಇರುವಳು

ಹ್ಯಾಗೆ ಬಿಟ್ಟಳು ಹೇಳೋ ಕೋತಿ

ಲಂಕಿಣಿಯನು ಕೊಂದು ಶಂಕೆ ಇಲ್ಲದೆ ನಾನು

ಬಿಂಕಾದಿಂದಲಿ ಬಂದೆ ಭೂತ || ೨ ||

ಕೊಂಬೆಕೊಂಬೆಗೆ ಕೋಟಿ ಮಂದಿ ರಾಕ್ಷಸರಿರೆ

ಹ್ಯಾಗೆ ಬಿಟ್ಟರು ಹೇಳೋ ಕೋತಿ

ಕೊಂಬೆಕೊಂಬೆಗೆ ಕೋಟಿ ಮಂದಿ ರಾಕ್ಷಸರನ್ನು

ಕೊಂದು ಹಾಕಿ ಬಂದೆನೋ ಭೂತ || ೩ ||

ಯಾವೂರೋ ಎಲೋ ನೀನು ಯಾವ ಭೂಮಿಯೋನಿಂದು

ಯಾಕೆ ಬಂದೆಯೋ ಹೇಳೋ ಕೋತಿ

ಯಾವ ವನದೊಳಗೆ ಜಾನಕಿದೇವಿ ಇದ್ದಳೋ

ಅವಳ ನೋಡ ಬಂದೆ ಭೂತ || ೪ ||

ದಕ್ಷಿಣಪುರಿ ಲಂಕಾ ದಾನವರಿಗಲ್ಲದೆ

ತ್ರಕ್ಷ್ಯಾದ್ಯರಿಗಳವಲ್ಲ ಕೋತಿ

ಪಕ್ಷಿಧ್ವಜ ರಾಮನ ಅಪ್ಪಣೆ ಎನಗಿಲ್ಲ

ಈ ಕ್ಷಣದಿ ತಪ್ಪಿಸಿಕೊಂಡೆ ಭೂತ || ೫ ||

ದೂತನಾಗಿಹೆ ಎನ್ನ ಕೈಯೊಳು ಸಿಕ್ಕಿಹೆ

ಕೋಪವಿನ್ಯಾತಕೋ ಕೋತಿ

ನಾ ತಾಳಿಕೊಂಡಿಹೆನು ಈ ಕ್ಷಣದಿ ಲಂಕೆ

ನಿರ್ಧೂಮವನು ಮಾಳ್ಪೆ ಭೂತ || ೬ ||

ನಿಮ್ಮಂಥ ದಾಸರು ನಿಮ್ಮರಸನ ಬಳಿ

ಎಷ್ಟು ಮಂದಿದ್ದಾರೋ ಕೋತಿ

ನನ್ನಂಥ ದಾಸರು ನಿನ್ನಂಥ ಹೇಡಿಗಳು

ಕೋಟ್ಯಾನು ಕೋಟಿಯೋ ಭೂತ || ೭ ||

ಎಲ್ಲಿಂದ ನೀ ಬಂದೆ ಏತಕೆಲ್ಲರ ಕೊಂದೆ

ಯಾವರಸನ ಬಂಟ ಕೋತಿ

ಚೆಲ್ವಯೋಧ್ಯಾಪುರದರಸು ಜಾನಕೀಪತಿ

ರಾಮಚಂದ್ರನ ಬಂಟ ಭೂತ || ೮ ||

ಸಿರಿ ರಾಮಚಂದ್ರನು ನಿನ್ನರಸನಾದರೆ

ಆತ ಮುನ್ನಾರು ಹೇಳೋ ಕೋತಿ

ಹಿರಣ್ಯಕನನು ಸೀಳಿ ಪ್ರಹ್ಲಾದಗೊಲಿದ

ಶ್ರೀ ಪುರಂದರ ವಿಠಲನೋ ಭೂತ || ೯ ||