ಮರುದಂಶರ ಮತ ಪಿಡಿಯದೆ ಇಹ

ರಾಗ : ನಾದನಾಮಕ್ರಿಯೆ

ತಾಳ : ಅಟತಾಳ

ಶ್ರೀಪಾದರಾಜರ ಕೃತಿ

ಮರುದಂಶರ ಮತ ಪಿಡಿಯದೆ ಇಹ

ಪರದಲ್ಲಿ ಸುಖವಿಲ್ಲವಂತೆ || ಪ ||

ಅರಿತು ವಿವೇಕದಿ ಮರೆಯದೆ ನಮ್ಮ

ಗುರುರಾಯರ ನಂಬಿ ಬದುಕಿರೋ || ಅ ಪ ||

ಕ್ಷೀರವ ಕರೆದಿಟ್ಟ ಮಾತ್ರದಿ

ಸಂಸ್ಕಾರವಿಲ್ಲದೆ ಘೃತವಾಗದಂತೆ

ಸೂರಿಜನರ ಸಂಗವಿಲ್ಲದೆ ಸಾರ

ವೈರಾಗ್ಯಭಾಗ್ಯ ಪುಟ್ಟದಂತೆ || ೧ ||

ಉಪದೇಶವಿಲ್ಲದ ಮಂತ್ರ ಏಸು

ಜಪಿಸಲು ಫಲಗಳ ಕೊಡದಂತೆ

ಉಪವಾಸ ವ್ರತಗಳಿಲ್ಲದೆ ಜೀವ

ತಪಸಿಯೆನಿಸಿಕೊಳ್ಳಲರಿಯನಂತೆ || ೨ ||

ಸಾರ ಮಧ್ವಶಾಸ್ತ್ರವೋದದೆ ಗುರು

ತಾರತಮ್ಯಜ್ಞಾನ ಪುಟ್ಟದಂತೆ

ಶ್ರೀರಂಗವಿಠಲನ ಭಜಿಸದೆ ಮುಂದೆ

ಪರಮಗತಿ ದೊರಕೊಲ್ಲದಂತೆ || ೩ ||