ಕಂಡೆ ಕರುಣಾನಿಧಿಯ

ಕಂಡೆ ಕರುಣಾನಿಧಿಯ ಗಂಗೆಯ ಮಂಡೆಯೊಳಿಟ್ಟ ದೊರೆಯ ಶಿವನ//ಪ//

ರುಂಡಮಾಲೆ ಸಿರಿಯ ನೊಸಲೊಳು ಕೆಂಡ ಕಣ್ಣಿನ ಬಗೆಯ ಹರನ//ಅಪ//

 

ಕಪ್ಪುಗೊರಳ ಹರನ ಕಂದರ್ಪ ಪಿತನ ಸಖನ 

ಮುಪ್ಪುರ ಗೆಲಿದವನ ಮುನಿಸುತ ಸರ್ಪ ಭೂಷಣ ಶಿವನ ಹರನ//

 

ಭಸಿತ ಭೂಷಿತ ಹರನ ಭಕ್ತರ ವಶದೊಳಗಿರುತಿಹನ 

ಪಶುಪತಿಯೆನಿಸುವವನ ವಸುಧೆಲಿ ಶಶಿಶೇಖರ ಶಿವನ ಹರನ//

 

ಗಜ ಚರ್ಮಾಂಬರನ ಗೌರಿವರ ತ್ರಿಜಗದೀಶ್ವರನ

ತ್ರಿಜಗನ್ಮೋಹನನ ತ್ರಿಲೋಚನ ತ್ರಿಪುರಾಂತಕ ಶಿವನ//

 

ಕಾಮಿತ ಫಲವೀವನ ಭಕುತರ ಪ್ರೇಮದಿಂ ಸಲಹುವನ 

ರಾಮ ನಾಮ ಸ್ಮರಣ ರತಿಪತಿ ಕಾಮನ ಸಂಹಾರನ ಶಿವನ//

ಧರೆಗೆ ದಕ್ಷಿಣ ಕಾಶಿ ಎಂದೆನಿಸುವ ವರ ಪಂಪವಾಸಿ 

ತಾರಕ ಉಪದೇಶಿ ಪುರಂದರ ವಿಠಲ ಭಕ್ತರ ಪೋಷಿ ಹರನ//