ಕರವ ಮುಗಿವೆ ಕರುಣಿಸು
ಬಾಯಿ ತೆರೆದ ಬಗೆಯೇನು ದೇವರ ದೇವ ।ಪ।
ತೋಯದಳ ನೇತ್ರನೆ ।।ಅಪ।।
ಅಸುರನ ಉದರವ ಹಸನಾಗಿ ಬಗೆವಾಗ
ಹಸಿದು ಬಾಯಿ ತೆರೆದೆಯೋ
ಬಿಸಜಾಕ್ಷ ಭೂಮಂಡಲವು
ಬಸಿರೆಳಿದ್ದ ಉಬ್ಬಸಿಗೆ ಬಾಯಿ ತೆರೆದೆಯೋ ।।೧।।
ಮಡದಿಯ ರೂಪಕ್ಕೆ ಮರುಳಾಗಿ ಅದರಿಂದ
ಬಡನೆ ಬಾಯಿ ತೆರೆದೆಯೋ
ದೃಢದಿ ಪ್ರಹ್ಲಾದನು ಒಡೆಯ
ರಕ್ಷಿಸೆಂಬೋ ನುಡಿಗೆ ಬಾಯಿ ತೆರೆದೆಯೋ ।।೨।।
ಗುರುಸತ್ಯಬೋಧರಾಯರ ನಿತ್ಯಭಜನೆಗೆ
ಬೆರೆತು ಬಾಯಿ ತೆರೆದೆಯೋ
ವರ ಕದರಮಂಡಲಗಿ ಹನುಮಯ್ಯನ ಒಡೆಯನೆ
ಕರವ ಮುಗಿವೆ ಬಾಯಿ ಮುಚ್ಚಿ ಕರುಣಿಸು ।।೩।।
No comments:
Post a Comment