ಸಾರಿ ಬಂದನೆ | ಪ್ರಾಣೇಶ ಬಂದನೆ

ರಾಗ : ಕಾಪಿ

ತಾಳ : ಆಟತಾಳ

ಪುರಂದರದಾಸರ ಕೃತಿ

ಸಾರಿ ಬಂದನೆ | ಪ್ರಾಣೇಶ ಬಂದನೆ || ಪ ||

ಸಾರಿ ಬಂದು ಲಂಕಾಪುರವ ಮೀರಿದ ರಾವಣನ |

ಕಂಡು ಧೀರ ವಯ್ಯಾರದಿಂದ || ಅ ಪ ||

ವಾಯುಪುತ್ರನೆ ಶ್ರೀರಾಮದೂತನೆ

ಪ್ರೀತಿಯಿಂದ ಸೀತಾಂಗನೆಗೆ ಮುದ್ರಿಕೆಯ ತಂದಿತ್ತವನೆ || ೧ ||

ಭೀಮಸೇನನೆ ಕುಂತೀ ತನಯನೆ

ವಿರಾಟನ ಮನೆಯಲಿ ನಿಂತು ಕೀಚಕನ ಸಂಹರಿಸಿದವನೆ || ೨ ||

ಮಧ್ವರಾಯನೆ ಸರ್ವಜ್ಞ ಶ್ರೇಷ್ಠನೆ

ಅದ್ವೈತವ ಗೆದ್ದು ಪುರಂದರವಿಠಲನ ಮುಂದೆ ನಿಂತನೆ || ೩ ||

ಪ್ರಾಣನಾಥನ ನೋಡುವ ಬನ್ನಿ

ರಾಗ : ಮಧ್ಯಮತಿ

ತಾಳ : ಆಟತಾಳ

ಪ್ರಾಣನಾಥನ ನೋಡುವ ಬನ್ನಿ| ಹರಿ ದಾಸರೆಲ್ಲ ||

ಬೇಡಿದ ಮುಕ್ತಿಯ ನೀಡುವ ನಾಡೋಳು|

ನೋಡುವ ಜನರ ಕಾಡುವ ನಮ್ಮ ದೊರೆ || ೧ ||

ಇಂದಿರೆ ಅರಸನ ಚರಣ ದ್ವಂದ್ವವ ಹೊಂದಿ

ಮಂದರಧರ ಮಧುಸೂದನ ಭಕ್ತನ || ೨ ||

ಹರಿಹರ ಕರಿವರದ ಪರಾತ್ಪರಾ

ಪುರುಷನ ಭಕ್ತನ ಪರಿಪಾಲನಮ್ಮ || ೩ ||

ಶ್ರೀದ ಹನುಮ ಭೀಮ ಮಧ್ವಾಂತರ್ಗತ

ರಾಮಕೃಷ್ಣ ವೇದವ್ಯಾಸಾರ್ಪಿತವೆಂದು || ೪ ||

ಸೃಷ್ಟಿಯೊಳಗೆ ಬಂದು ಮುಕ್ತ ಪುರಾನಿಂದು

ದುಷ್ಟ ದೈತ್ಯರ ಕೊಂದು ವೆಂಕಟವಿಠಲನ ದಾಸನೆಂದು || ೫ ||

ಜಯ ವಾಯು ಹನುಮಂತ ಜಯ ಭೀಮ ಬಲವಂತ

ರಾಗ : ನಾಟಿ

ತಾಳ : ಝಂಪೆ ತಾಳ

ವ್ಯಾಸರಾಜರ ಕೃತಿ

ಜಯ ವಾಯು ಹನುಮಂತ ಜಯ ಭೀಮ ಬಲವಂತ | ಪ |

ಜಯ ಪೂರ್ಣ ಮತಿವಂತ ಜಯ ಸಲಹೊ ಸಂತ | ಅ ಪ |

ಅಂಜನೆಯಲಿ ಜನಿಸಿ ಅಂದು ರಾಮನ ಸೇವೆ

ನಂದದಲಿ ಮಾಡಿ ಕಪಿ ಬಲವ ಕೂಡಿ

ಸಿಂಧು ಲಂಘಿಸಿ ವನ ಭಂಗಿಸಿ

ಸೀತೆಗುಂಗುರ ಕೊಟ್ಟೆ ಲಂಕಾಪುರವ ಸುಟ್ಟೆ | ೧ |

ಹರಿಗೆ ಚೂಡಾಮಣಿಯನಿತ್ತು ಹರಿಗಳ ಕೂಡಿ

ಶರಧಿಯನು ಕಟ್ಟಿ ಅರಿಬಲವ ಕುಟ್ಟಿ

ಉರಗ ಬಂಧನದಿಂದ ಕಪಿವರರು ಮೈಮರೆಯೆ

ಗಿರಿಯ ಸಂಜೀವನವ ತಂದು ಬದುಕಿಸಿದೆ | ೨ |

ದ್ವಾಪರಾಂತ್ಯದಿ ಪಾಂಡು ಭೂಪನಾತ್ಮಜನೆನಿಸಿ

ಶ್ರೀಪಾರ್ಥಸಾರಥಿಯ ಭಜಕ ನೀನಾದೆ

ಪಾಪಿ ಮಾಗಧ ಬಕ ಕೀಚಕ ಹಿಡಿಂಬಕರ

ಕೋಪದಿಂದಲಿ ತರಿದೆ ಮೂಜಗದಿ ಮೆರೆದೆ | ೩ |

ಧುರದಲಿ ದುರ್ಯೋಧನನ ಬಲವನ್ನು ತರಿದೆ

ಅರಿತು ದುಶ್ಯಾಸನನ ಒಡಲನ್ನು ಬಗೆದೆ

ಉರವ ತಪ್ಪಿಸಿ ಕೌರವನ್ನ ತೊಡೆಗಳ ಮುರಿದೆ

ಹರಿಯ ಕಿಂಕರ ಧುರಂಧರಗಾರು ಸರಿಯೆ | ೪ |

ಕಲಿಯುಗದಲಿ ಕಳ್ಳರುದಿಸಿ ದುರ್ಮತಗಳನು

ಬಲಿಸಿ ಶ್ರೀಹರಿಯ ಗುಣಗಳನು ಮರೆಸಿ

ಕಲಿಯನನುಸರಿಸಲು ಗುರುವಾಗಿ ಅವತರಿಸಿ

ಖಳರ ದುರ್ಮತ ಮುರಿದೆ ಶ್ರೀಕೃಷ್ಣ ಪರನೆಂದೆ | ೫ |