ಕರವ ಮುಗಿದ ಮುಖ್ಯಪ್ರಾಣ ಕರವ ಮುಗಿದ

ರಾಗ : ಕಾಪಿ

ತಾಳ : ಛಾಪುತಾಳ

ಪುರಂದರದಾಸರ ಕೃತಿ

ಕರವ ಮುಗಿದ ಮುಖ್ಯಪ್ರಾಣ ಕರವ ಮುಗಿದ | ಪ |

ಕರವ ಮುಗಿದ ಶ್ರೀಹರಿಗೆ ಎದುರಾಗಿ

ದುರುಳರ ಸದೆದು ಶರಣರ ಪೊರೆಯೆಂದು | ಅ ಪ |

ಜೀವೇಶರೈಕ್ಯವು ಜಗತು ಮಿಥ್ಯಾ ಎಂದು

ಈ ವಿಧ ಪೇಳುವ ಮಾಯಿಗಳನಳಿಯೆಂದು | ೧ |

ಇಲ್ಲಿ ಮಾತ್ರ ಭೇದ ಅಲ್ಲಿ ಒಂದೇ ಎಂಬ

ಕ್ಷುಲ್ಲಕರನು ಹಿಡಿದು ಹಲ್ಲು ಮುರೀಯೆಂದು | ೨ |

ತಾರತಮ್ಯ ಪಂಚಭೇದ ಸತ್ಯವೆಂಬ

ಮಾರುತ ಮತ ಪೊಂದಿದವರ ನೀ ಕಾಯೆಂದು | ೩ |

ಪರಿಪರಿ ಜೀವರ ಹೃದಯದೊಳಗೆ ನಿಂತು

ನಿರುತ ಮಾಡುವ ಕರ್ಮ ಹರಿಗೆ ಅರ್ಪಿತವೆಂದು | ೪ |

ಹರಿ ಮಾಡುವ ವ್ಯಾಪಾರ ಬಲ್ಲ ಕಾರಣನಾಗಿ

ಸಿರಿ ಪುರಂದರ ವಿಠಲನ ಚರಣಕ್ಕೆರಗಿ ನಿಂತು | ೫ |