ನರಸಿಂಹ ಮಂತ್ರ ಒಂದಿರಲು ಸಾಕು

ರಾಗ : ಬಿಲಹರಿ

ತಾಳ : ಆಟತಾಳ

ನರಸಿಂಹ ಮಂತ್ರ ಒಂದಿರಲು ಸಾಕು

ನರಸಿಂಹ ಮಂತ್ರ ಒಂದಿರಲು ಸಾಕು

ದುರಿತಕೋಟಿಗಳ ಸಂಹರಿಸಿ ಭಾಗ್ಯವನೀವ । ಪ ।

ಹಸುಳೆ ಪ್ರಹ್ಲಾದನ ತಲೆಗಾಯ್ದದೀ ಮಂತ್ರ

ಅಸುರನೊಡಲ ಬಗೆದ ದಿವ್ಯ ಮಂತ್ರ

ವಸುಧೆಯೊಳು ದಾನವರ ಅಸುವ ಸೆಳೆವ ಮಂತ್ರ

ಪಶುಪತಿಗೆ ಪ್ರಿಯವಾದ ಮೂಲಮಂತ್ರ ।। ೧ ।।

ದಿಟ್ಟ ಧೃವರಾಯಗೆ ಪಟ್ಟಗಟ್ಟಿದ ಮಂತ್ರ

ಸೃಷ್ಟಿಯೊಳು ವಿಭೀಷಣನ ಪೊರೆದ ಮಂತ್ರ

ತುಟ್ಟ ತುದಿಯೊಳು ಅಜಾಮಿಳನ ಸಲಹಿದ ಮಂತ್ರ

ಮುಟ್ಟಿ ಭಜಿಪರಿಗಿದು ದೃಷ್ಟಮಂತ್ರ ।। ೨ ।।

ಹಿಂಡುಭೂತವ ಕಡುದು ತುಂಡು ಮಾಡುವ ಮಂತ್ರ

ಕೊಂಡಾಡಿಲೋಕಕದ್ದುಂಡ ಮಂತ್ರ

ಗಂಡುಗಲಿ ಪ್ರಚಂಡ ಹಿಂಡು ದಾನವರುಗಳ

ಗಂಡ ಪುರಂದರವಿಠಲನ ಮಹಾಮಂತ್ರ ।। ೩ ।।

ನಮೋ ನಮಸ್ತೇ ನರಸಿಂಹ ದೇವಾ

ರಾಗ : ಸಾವೇರಿ

ತಾಳ : ಆದಿತಾಳ

ನಮೋ ನಮಸ್ತೇ ನರಸಿಂಹ ದೇವಾ - ಸ್ಮರಿಸುವವರ ಕಾವ

ಸುಮಹಾತ್ಮ ನಿನಗೆಣೆ ಲೋಕದೊಳಗಾವ ತ್ರಿಭುವನ ಸಂಜೀವಾ

ಉಮೆಯರಸ ಹೃತ್ಕಮಲದ್ಯುಮಣಿ

ಮಾ ರಮಣ ಕನಕ ಸಂಯಮಿವರವರದಾ । ಪ ।

ಕ್ಷೇತ್ರಜ್ಞ ಕ್ಷೇಮಧಾಮಭೂಮಾ ದಾನವಕುಲಭೀಮ

ಗಾತ್ರಸನ್ನುತ ಬ್ರಹ್ಮಾದಿ ಸೋಮ

ಸನ್ಮಂಗಳನಾಮ ಚಿತ್ರಮಹಿಮನಕ್ಷತ್ರನೇಮಿ

ಸರ್ವತ್ರ ಮಿತ್ರ ಸುಚರಿತ್ರ ಪವಿತ್ರ ।। ೧ ।।

ಅಪರಾಜಿತ ಅನಘ ಅನಿರ್ವಿಣ್ಣ ಲೋಕೈಕಶರಣ್ಯ

ಶಫರಕೇತುಕೋಟಿಲಾವಣ್ಯ ದೈತ್ಯೇಂದ್ರ ಹಿರಣ್ಯಕ

ಶಿಪುತನಯನ ಕಾಯ್ದೆಪೆನೆನುತಲಿ

ನಿಷ್ಕಪಟ ಮನುಜಹರಿವಪುಷ ನೀನಾದೆ ।। ೨ ।।

ತಪನಕೋಟಿ ಪ್ರಭಾ ಶರೀರ - ದುರಿತೌಘವಿದೂರ

ಪ್ರಪಿತಾಮಹಮಂದಾರ - ಖಳವಿಪಿನಕುಠಾರ

ಕೃಪಣಬಂದು ತವ ನಿಪುಣತನಕೆ

ನಾನುಪಮೆಗಾಣೆ ಕಾಶ್ಯಪಿವರವಹನಾ ।। ೩ ।।

ವೇದವೇದಾಂಗವೇದ್ಯ - ಸಾಧ್ಯ ಅಸಾಧ್ಯ

ಶ್ರೀದ ಮುಕ್ತಾಮುಕ್ತಾರಾಧ್ಯ - ಅನುಪಮಅನವದ್ಯ

ಮೋದಮಯನೆ ಪ್ರಹ್ಲಾದವರದ

ನಿತ್ಯೊದಯ ಮಂಗಳ ಪಾದಕಮಲಕೆ ।। ೪ ।।

ಅನಿಮಿತ್ತ ಬಂಧು ಜಗನ್ನಾಥ ವಿಠಲ ಸಾಂಪ್ರತ

ನಿನಗೆ ಬಿನ್ನೈಪೆ ಎನ್ನಯ ಮಾತ ಲಾಲಿಸುವದು ತಾತ

ಗಣನೆಯಿಲ್ಲದವಗುಣವೆನಿಸಿದೆ ಪ್ರತಿಕ್ಷಣಕೆ

ಕಥಾಮೃತ ಉಣಿಸು ಕರುಣದಿ ।। ೫ ।।

ನರಸಿಂಹ ಪಾಹೀ ಲಕ್ಷ್ಮೀ ನರಸಿಂಹ

ರಾಗ : ಶಂಕರಾಭರಣ

ತಾಳ : ಅಟ್ಟತಾಳ

ನರಸಿಂಹ ಪಾಹೀ ಲಕ್ಷ್ಮೀ ನರಸಿಂಹ ।ಪ।

ನರಸಿಂಹ ನಮಿಪೆ ನಾ ನಿನ್ನ । ಚಾರುಚರಣಕಮಲಕೆ ನೀ ಎನ್ನ।

ಕರವ ಪಿಡಿದು ನಿಜ ಶರಣನೆಂದೆನಿಸು ।

ಭಾಸುರ ಕರುಣಾಂಬುಧೆ ಗರುಡವಾಹನ - ಲಕ್ಷ್ಮೀ ।।ಅ ಪ ।।

ತರಳ ಪ್ರಹ್ಲಾದನ ನುಡಿಯ ಕೇಳಿ ।

ತ್ವರಿತದಿ ಬಂದ್ಯೋ ಎನ್ನೊಡೆಯ ನಾನು

ಕರುಣಾಳೊ ಭಕ್ತರ ಭಿಡೆಯ ಮೀರಲರಿಯೆ।

ಎಂದೆಂದು ಕೆಂಗಿಡಿಯ ಅಹಭರದಿಂದುಗುಳುತ ಬೊಬ್ಬಿರುದಿ ಬೆಂಬತ್ತಿ

ಕರ್ಬುರಕಶ್ಯಪುವಿನ ಹಿಂಗರುಳ ಪಿಡಿದ ಲಕ್ಷ್ಮೀ ।। ೧ ।।

ಪ್ರಳಯಾಂಬುನಿಧಿಘನಘೋಶದಂತೆ

ಘುಳುಘುಳಿಸುತಲಿ ಪ್ರದೋಷ ಕಾಲ ತಿಳಿದು

ದೈತ್ಯನ ಅತಿರೋಷದಿಂದ ಅಪ್ಪಳಿಸಿ ಮೇದಿನಿಗೆ ನಿರ್ದೋಷ

ಅಹ ಸೆಳೆ ಸೆಳೆಯುತ ಚರ್ಮಸುಲಿದು ಕೆನ್ನೆತ್ತರೋಕುಳಿಯಾಡಿದೆ

ದಿಶಾವಳಿಗಳೊಳಗೆ - ಲಕ್ಷ್ಮೀ ।। ೨ ।।

ಕ್ರೂರದೈತ್ಯನ ದೋರೆಗರುಳ ತೆಗೆದ್ಹಾರ ಮಾಡಿದೆ

ನಿಜಕೊರಳ ಕಂಡು ವಾರಿಜಾಸನ ಮುಖ್ಯರರಳ

ಪುಷ್ಪಸಾರಗರೆದು ವೇಗ ತರಳ

ಅಹ ಧೀರಪ್ರಹ್ಲಾದನ ತೋರಿತ್ವದಂಘ್ರಿ

ಸರೋರುಹವನು ಸಾರ್ದರೋ ಕಾರುಣ್ಯನಿಧೆ - ಲಕ್ಷ್ಮೀ ।। ೩ ।।

ಜಯಜಯ ದೇವವರೇಣ್ಯ ಮಹದ್ಭಯ

ನಿವಾರಣನೆ ಅಗಣ್ಯ ಗುಣಾಶ್ರಯ ಘೋರ

ದುರಿತಾರಣ್ಯ ಧನಂಜಯ ಜಗದೇಕಶರಣ್ಯ

ಅಹ ಲಯವಿವರ್ಜಿತ ಲೋಕತ್ರಯವ್ಯಾಪ್ತ

ನಿಜಭಕ್ತಪ್ರಿಯ ಘೋರಾಮಯಹರ ದಯಮಾಡು - ಲಕ್ಷ್ಮೀ ।। ೪ ।।

ಕುಟಿಲದವೇಷದವ ನೀನಲ್ಲ ನಿನ್ನಾರ್ಭಟಕಂಜಿದರು ಸುರರೆಲ್ಲ

ನರನಟನೆ ತೋರಿದ್ಯೋ ಲಕ್ಷ್ಮೀನಲ್ಲ

ನಾಪಾಸಟಿ ಕಾಣೆನಪ್ರತಿಮಲ್ಲ

ಅಹ ವಟಪತ್ರಶಯನ ಧೂರ್ಜಟಿವಂದ್ಯ

ಜಗನ್ನಾಥವಿಠಲ ಕೃತಾಂಜಲಿಪುಟದಿ ಬೇಡುವೆ - ಲಕ್ಷ್ಮೀ ।। ೫ ।। 

ಹನುಮ ಜಯಂತಿಯ ಆಹ್ವಾನ ಪತ್ರಿಕೆ