ಏನ ಬಣ್ಣಿಪೆನಮ್ಮ

ರಾಗ : ನಾಟಿ

ತಾಳ : ಮಿಶ್ರಛಾಪುತಾಳ

ವಾದಿರಾಜರ ಕೃತಿ

ಏನ ಬಣ್ಣಿಪೆನಮ್ಮ | ಪ |

ಬಣ್ಣಿಪೆ ನಮ್ಮಯ್ಯ ಗುರುರಾಯರ | ಅ ಪ |

ಮಧ್ವಸರೋವರ ತೀರದ ಮುದ್ದುಕೃಷ್ಣನ

ಪ್ರಸಿದ್ಧಿಯಿಂದ ಪೂಜೆಮಾಡಿ ಗೆದ್ದ ಬಲವಂತ ರಾಯರ | ೧ |

ಭವಬಂಧ ಮಾಯಿಗಳ ಕಾಲಲೊದ್ದು ಮೂಲಿಲ್ಹಾಕಿ

ಮಧ್ವಶಾಸ್ತ್ರವೆಲ್ಲ ಪ್ರಸಿದ್ಧ ಮಾಡಿದ ಯತಿರಾಯರ | ೨ |

ಸಿರಿ ಹಯವದನ ಚರಣಕಮಲವನ್ನು

ನಿರುತವಾಗಿ ಸೇವಿಸುವ ಅಚ್ಚಿನ್ನ ನಿಜದಾಸರ | ೩ |

ಗುರು ಮಧ್ವಮುನಿರನ್ನ ಮೂರು ಪರಿಯದೋರಿದೆ ನಿನ್ನ

ರಾಗ : ಕಮಾಚ್

ತಾಳ : ಆದಿತಾಳ

ಮಹಿಪತಿದಾಸರ ಕೃತಿ.

ಗುರು ಮಧ್ವಮುನಿರನ್ನ ಮೂರು ಪರಿಯದೋರಿದೆ ನಿನ್ನ

ಹರಿಭಕ್ತಿಯಲಿ ಅವಿಚ್ಛಿನ್ನ ಸರಿಯಾರು ಧರೆಯೊಳು ನಿನ್ನ

ಸ್ಮರಣೆಯಲಿಹೆ ರಾಮನ್ನ ಪರಮಪಾವನ್ನ | ೧ |

ಅತಿಬಾಹು ಪರಾಕ್ರಮ ಕ್ಷಿತಿಯೊಳು ನಿನ್ನದೇ ನೇಮ

ಪ್ರಥಮಲ್ಯಾದೆ ಹನುಮ ದ್ವಿತಿಯಲ್ಯಾದೆ ಭೀಮ

ತೃತಿಯಲ್ಲಿ ಪೂರ್ಣ ಪ್ರಾಜ್ಞನೆನಿಸಿದೆ ನಿಸ್ಸೀಮ | ೨ |

ಸಾಹ್ಯಕ್ಕೆ ಕಾರಣ ಮಹಾದೈತ್ಯರ ಮರ್ದನ

ಶ್ರೀಹರಿ ಸಾನ್ನಿಧ್ಯ ಪೂರ್ಣ ಇಹ ಸಕಲನಿಪುಣ

ಮಹಿಪತಿ ಮುಖ್ಯಪ್ರಾಣ ಸ್ವಹಿತ ಸಾಧನ | ೩ |

ನೆರೆನಂಬಿ ಪಡೆಯಿರೋ ಹಿತವ ನಮ್ಮ

ರಾಗ : ಪಂತುವರಾಳಿ

ತಾಳ : ತಿಶ್ರಛಾಪು

ವಾದಿರಾಜರ ಕೃತಿ

ನೆರೆನಂಬಿ ಪಡೆಯಿರೋ ಹಿತವ ನಮ್ಮ

ಗುರುವಾದ ಮಧ್ವಮುನಿ ಸಮ್ಮತವ | ಪ |

ತ್ರೇತೆಯೊಳಂಜನಾ ತನಯನಾಗಿ

ಸೀತಾರಮಣ ರಘುನಾಥಗೆ ಪ್ರಿಯ

ದೂತತನದಿ ಖಳತತಿಯ ಕೊಂದು

ಖ್ಯಾತಿ ಪಡೆದ ಹನುಮನಾದ ಯತಿಯ | ೧ |

ದ್ವಾಪರದಲಿ ಭೀಮನೆನಿಸಿ ಪಾಂಡು

ಭೂಪನರಸಿ ಕುಂತಿದೇವಿಯೊಳುದಿಸಿ

ಶ್ರೀಪತಿಗರ್ಥಿಯ ಸಲಿಸಿ ನೃಪಾನೃಪರೆಲ್ಲರ

ಕೊಂದ ಮಹಿಮನ್ನ ಭಜಿಸಿ | ೨ |

ಕಲಿಯುಗದಲ್ಲಿ ಯತಿಯಾಗಿ ಈ

ಇಳೆಯ ದುಶ್ಶ್ಯಾಸ್ತ್ರವ ಜಾರಿದ ವಿರಾಗಿ

ಕುಲಗುರು ಶ್ರೀ ಮಧ್ವಯೋಗಿ ನಮ್ಮ

ಚೆಲುವ ಹಯವದನ ಭಂಟನೆಂದು ಬಾಗಿ | ೩ |

ಆನಂದ ತೀರ್ಥರೆಂಬೋ

ರಾಗ : ಸೌರಾಷ್ಟ್ರ

ತಾಳ : ಆದಿತಾಳ

ಆನಂದ ತೀರ್ಥರೆಂಬೋ ಅರ್ಥಿಯ ಪೆಸರುಳ್ಳ ಗುರು ಮಧ್ವಮುನಿರಾಯ |ಪ|

ಏನೆಂಬೆ ನಾನಿಮ್ಮ ಕರುಣಕ್ಕೆ ಎಣೆಗಾಣೆ ಗುರು ಮಧ್ವಮುನಿರಾಯ | ಅ ಪ |

ಬೇಸರದೆ ಸರ್ವರೊಳು ಶ್ವಾಸಜಪಂಗಳ ಮಾಡಿ ಗುರು ಮಧ್ವಮುನಿರಾಯ |

ಶ್ರೀಶಗರ್ಪಿಸುತ ನಿನ್ನ ದಾಸರನು ಸಲಹಿದಿ ಗುರು ಮಧ್ವಮುನಿರಾಯ | ೧ |

ಅಂದು ಹನುಮಂತನಾಗಿ ಬಂದು ಸುಗ್ರೀವಗೆ ಗುರು ಮಧ್ವಮುನಿರಾಯ |

ಅಂದವಾದ ಪದವಿತ್ತಾನಂದದಿಂದದ ಪೊರೆದೆಯೊ ಗುರು ಮಧ್ವಮುನಿರಾಯ | ೨ |

ಕುಂತಿಯ ಕುಮಾರನಾಗಿ ಹೊಂತ ಕೌರವರ ಕೊಂದೆ ಗುರು ಮಧ್ವಮುನಿರಾಯ |

ಅನ್ನತ ಪುಣ್ಯವ ಗಳಿಸಿ ಶ್ರೀಕಾಂತನಿಗರ್ಪಿಸಿದೆ ಗುರು ಮಧ್ವಮುನಿರಾಯ | ೩ |

ಅದ್ವೈತರನು ಕಾದು ಗೆದ್ದು ನಿನ್ನ ಭಕ್ತರಿಗೆ ಗುರು ಮಧ್ವಮುನಿರಾಯ |

ಶುದ್ಧ ತಾತ್ಪರ್ಯ ವಾಕ್ಯ ಪದ್ಧತಿಯ ತಿಳಿಸಿದೆ ಗುರು ಮಧ್ವಮುನಿರಾಯ | ೪ |

ಗುರುಪ್ರಾಣೇಶವಿಠಲ ಪರನೆಂದು ಡಂಗುರವ ಗುರು ಮಧ್ವಮುನಿರಾಯ |

ಸಾರಿ ಸಜ್ಜನರಿಗೆ ಹರಿಯ ಲೋಕ ತೋರಿಸಿದಿ ಗುರು ಮಧ್ವಮುನಿರಾಯ । ೫ ।