ನರಸಿಂಹ ಪಾಹೀ ಲಕ್ಷ್ಮೀ ನರಸಿಂಹ

ರಾಗ : ಶಂಕರಾಭರಣ

ತಾಳ : ಅಟ್ಟತಾಳ

ನರಸಿಂಹ ಪಾಹೀ ಲಕ್ಷ್ಮೀ ನರಸಿಂಹ ।ಪ।

ನರಸಿಂಹ ನಮಿಪೆ ನಾ ನಿನ್ನ । ಚಾರುಚರಣಕಮಲಕೆ ನೀ ಎನ್ನ।

ಕರವ ಪಿಡಿದು ನಿಜ ಶರಣನೆಂದೆನಿಸು ।

ಭಾಸುರ ಕರುಣಾಂಬುಧೆ ಗರುಡವಾಹನ - ಲಕ್ಷ್ಮೀ ।।ಅ ಪ ।।

ತರಳ ಪ್ರಹ್ಲಾದನ ನುಡಿಯ ಕೇಳಿ ।

ತ್ವರಿತದಿ ಬಂದ್ಯೋ ಎನ್ನೊಡೆಯ ನಾನು

ಕರುಣಾಳೊ ಭಕ್ತರ ಭಿಡೆಯ ಮೀರಲರಿಯೆ।

ಎಂದೆಂದು ಕೆಂಗಿಡಿಯ ಅಹಭರದಿಂದುಗುಳುತ ಬೊಬ್ಬಿರುದಿ ಬೆಂಬತ್ತಿ

ಕರ್ಬುರಕಶ್ಯಪುವಿನ ಹಿಂಗರುಳ ಪಿಡಿದ ಲಕ್ಷ್ಮೀ ।। ೧ ।।

ಪ್ರಳಯಾಂಬುನಿಧಿಘನಘೋಶದಂತೆ

ಘುಳುಘುಳಿಸುತಲಿ ಪ್ರದೋಷ ಕಾಲ ತಿಳಿದು

ದೈತ್ಯನ ಅತಿರೋಷದಿಂದ ಅಪ್ಪಳಿಸಿ ಮೇದಿನಿಗೆ ನಿರ್ದೋಷ

ಅಹ ಸೆಳೆ ಸೆಳೆಯುತ ಚರ್ಮಸುಲಿದು ಕೆನ್ನೆತ್ತರೋಕುಳಿಯಾಡಿದೆ

ದಿಶಾವಳಿಗಳೊಳಗೆ - ಲಕ್ಷ್ಮೀ ।। ೨ ।।

ಕ್ರೂರದೈತ್ಯನ ದೋರೆಗರುಳ ತೆಗೆದ್ಹಾರ ಮಾಡಿದೆ

ನಿಜಕೊರಳ ಕಂಡು ವಾರಿಜಾಸನ ಮುಖ್ಯರರಳ

ಪುಷ್ಪಸಾರಗರೆದು ವೇಗ ತರಳ

ಅಹ ಧೀರಪ್ರಹ್ಲಾದನ ತೋರಿತ್ವದಂಘ್ರಿ

ಸರೋರುಹವನು ಸಾರ್ದರೋ ಕಾರುಣ್ಯನಿಧೆ - ಲಕ್ಷ್ಮೀ ।। ೩ ।।

ಜಯಜಯ ದೇವವರೇಣ್ಯ ಮಹದ್ಭಯ

ನಿವಾರಣನೆ ಅಗಣ್ಯ ಗುಣಾಶ್ರಯ ಘೋರ

ದುರಿತಾರಣ್ಯ ಧನಂಜಯ ಜಗದೇಕಶರಣ್ಯ

ಅಹ ಲಯವಿವರ್ಜಿತ ಲೋಕತ್ರಯವ್ಯಾಪ್ತ

ನಿಜಭಕ್ತಪ್ರಿಯ ಘೋರಾಮಯಹರ ದಯಮಾಡು - ಲಕ್ಷ್ಮೀ ।। ೪ ।।

ಕುಟಿಲದವೇಷದವ ನೀನಲ್ಲ ನಿನ್ನಾರ್ಭಟಕಂಜಿದರು ಸುರರೆಲ್ಲ

ನರನಟನೆ ತೋರಿದ್ಯೋ ಲಕ್ಷ್ಮೀನಲ್ಲ

ನಾಪಾಸಟಿ ಕಾಣೆನಪ್ರತಿಮಲ್ಲ

ಅಹ ವಟಪತ್ರಶಯನ ಧೂರ್ಜಟಿವಂದ್ಯ

ಜಗನ್ನಾಥವಿಠಲ ಕೃತಾಂಜಲಿಪುಟದಿ ಬೇಡುವೆ - ಲಕ್ಷ್ಮೀ ।। ೫ ।।